ჩვენი ადვოკატები

ზურაბ როსტიაშვილი დღეს ხელმძღვანელობს „როსტიაშვილი & ცხვედიანის საადვოკატო ბიუროს“ — ინსტიტუციას, რომელიც მან თავად, ციცინო ცხვედიანთან ერთად, ჯერ კიდევ 1996 წელს დააფუძნა. თითქმის სამი ათწლეულის განმავლობაში ბიურომ რამდენიმე სამართლებრივი სახეცვლილება განიცადა და სახელწოდებაც არაერთხელ შეიცვალა, თუმცა ერთი რამ უცვლელი დარჩა: მისი კლიენტების ადვოკატირება ამ ორი ადვოკატის ხელში იყო და რჩება. სწორედ ამ უწყვეტობაზე დგას ბიუროს დღევანდელი სახე — 1996 წლიდან დღემდე. ზურაბ როსტიაშვილი საერთო სპეციალიზაციის ადვოკატია, თუმცა მისი პროფესიული სახე, უპირველესად, სისხლის სამართალმა განსაზღვრა: იმ სფერომ, სადაც ადვოკატის შეცდომის ფასი ადამიანის თავისუფლებაა. დამატებით სპეციალიზებულია არასრულწლოვანთა მართლმსაჯულებაში, სადაც დაცვის სტრატეგია არა მხოლოდ სამართლებრივ, არამედ - ბავშვის საუკეთესო ინტერესის სტანდარტსაც უნდა დაეყრდნოს.

მისი პრაქტიკის მთავარი ინდიკატორი შედეგებია. ზურაბ როსტიაშვილმა გამამართლებელ განაჩენს მიაღწია საქმეზე, სადაც მისი დაცვის ქვეშ მყოფ ერთადერთ ბრალდებულს შვიდი ადამიანის მკვლელობა ედებოდა ბრალად. განაჩენი ერთპიროვნულად მოსამართლემ დაადგინა — ანუ გადაწყვეტილების სრული სიმძიმე ერთ ადამიანს დააწვა, ისეთი მასშტაბის ბრალდების ფონზე, სადაც სასამართლოსთვის გამამტყუნებელი განაჩენი ყოველთვის „უსაფრთხო“ არჩევანია. მსოფლიოს უმეტეს სამართლებრივ სისტემაში ამ სიმძიმის საქმეს ნაფიცი მსაჯულები ან მოსამართლეთა კოლეგია იხილავს, რაც ამ შედეგს გამონაკლისად აქცევს არა მხოლოდ ქართული, არამედ - საერთაშორისო სასამართლო პრაქტიკის მასშტაბითაც.

ცალკე აღნიშვნის ღირსია მისი გამოცდილება ნაფიც მსაჯულთა სასამართლოში. ეს ქართული სისხლის სამართლის პროცესის ის სეგმენტია, სადაც ადვოკატთა შედარებით ვიწრო წრე მუშაობს: საქმეთა კატეგორია შეზღუდულია, ხოლო თავად პროცესი სრულიად სხვა უნარებს მოითხოვს — მსაჯულებთან, პროფესიონალ იურისტებთან კი არა, თანამოქალაქეებთან საუბრის უნარს, ზეპირი მტკიცების ხელოვნებას და დარწმუნების იმ ტექნიკას, რომელიც ერთადერთ, გადამწყვეტ შანსზეა გათვლილი. ზურაბ როსტიაშვილს ამ ფორმატში მუშაობის მრავალწლიანი გამოცდილება აქვს. მისი პრაქტიკის ერთ-ერთი შედეგია საქმე, სადაც ვერდიქტი დაცვის მხარის სასარგებლოდ 12 ხმით, ერთსულოვნად დასრულდა და ბრალდებული სრულად გამართლდა. ერთ შემთხვევაში მან დაცვის პოზიცია პროფესიონალ მოსამართლეს გაატანა, მეორეში — თორმეტივე ნაფიც მსაჯულს; ეს ორი სრულიად განსხვავებული პროფესიული უნარია და ორივეს ფლობა ცოტას შეუძლია. ზურაბ როსტიაშვილს არაერთი მაღალი საზოგადოებრივი ინტერესის საქმე აქვს წარმართული და წლების განმავლობაში თანმიმდევრულად იცავს პრინციპს, რომ დაცვის უფლება და სამართლიანი სასამართლო არა ფორმალობა, არამედ პროცესის საყრდენია.

მისი პრაქტიკა ეროვნული ინსტანციებით არ შემოიფარგლება: იგი მუშაობს ადამიანის უფლებათა ევროპული სასამართლოს მიმართულებითაც, სადაც საქმე მას შემდეგ მიდის, რაც შიდასახელმწიფოებრივი საშუალებები ამოწურულია — ანუ იმ ეტაპზე, როცა კლიენტისთვის ეს უკანასკნელი შესაძლებლობა რჩება. იგი ასევე არის საქართველოს ადვოკატთა ასოციაციის მენტორი ადვოკატი — სტატუსი, რომელიც პროფესიულ საზოგადოებაში მხოლოდ იმ ადვოკატებს ენიჭებათ, ვისაც ახალგაზრდა კოლეგების მომზადება და პრაქტიკაში შეყვანა ენდობა.

საადვოკატო საქმიანობაში მიღწეული წარმატებებისათვის იგი რამდენჯერმე იყო დაჯილდოებული, ხოლო საქართველოს ადვოკატთა ასოციაციამ მას ლუარსაბ ანდრონიკაშვილის ორდენი მიანიჭა.

ინდივიდუალურ პრაქტიკასთან ერთად, იგი წლებია ჩართულია პროფესიის თვითრეგულირებაში: 2021-2025 წლებში იყო საქართველოს ადვოკატთა ასოციაციის სარევიზიო საბჭოს წევრი, ხოლო 2013-2021 წლებში — ასოციაციის აღმასრულებელი საბჭოს წევრი, ანუ ორი მოწვევის განმავლობაში მონაწილეობდა ქვეყნის საადვოკატო კორპუსის მართვასა და პროფესიული სტანდარტების ჩამოყალიბებაში.

ბიუროს ისტორია მისივე ბიოგრაფიის გაგრძელებაა. 2010-2020 წლებში იგი ხელმძღვანელობდა „ზურაბ როსტიაშვილის საადვოკატო ბიუროს“, რომელიც 2006 წელს „ადვოკატთა და დამცველთა ასოციაციის“ რეორგანიზაციის შედეგად ჩამოყალიბდა და რომლის თავმჯდომარეც გახლდათ. თავად ასოციაცია მან 1996 წელს დააფუძნა და მისი პრეზიდენტი იყო; ერთი წლით ადრე კი, 1995 წელს, ქართლოს ღარიბაშვილთან და სხვა კოლეგებთან ერთად, „საქართველოს ადვოკატთა დამოუკიდებელი კორპორაციის“ დამფუძნებელთა შორის იდგა — იმ თაობის ადვოკატებს შორის, რომლებმაც დამოუკიდებელი ადვოკატურის ინსტიტუტი ნულიდან ააშენეს.

პროფესიაში იგი 1985 წელს შევიდა: საქართველოს სახელმწიფო უნივერსიტეტის იურიდიული ფაკულტეტის დამთავრებისთანავე (1980-1985), ე.წ. განაწილებით, მუშაობა დაიწყო საქართველოს სსრ ადვოკატთა კოლეგიის თბილისის მთაწმინდის რაიონის ადვოკატურაში. მას შემდეგ მისი საადვოკატო საქმიანობა არასოდეს შეწყვეტილა.

ზურაბი ფლობს ქართულ, რუსულ, აზერბაიჯანულ და თურქულ ენებს — რაც ბიუროს საშუალებას აძლევს, პირდაპირ, შუამავლის გარეშე, იმუშაოს რეგიონული და საერთაშორისო კლიენტურის ინტერესებზე.

ციცინო ცხვედიანი „როსტიაშვილი & ცხვედიანის საადვოკატო ბიუროს“ თანადამფუძნებელი და მმართველი პარტნიორია. ბიურო, რომელიც მან ზურაბ როსტიაშვილთან ერთად 1996 წელს ჩამოაყალიბა, თითქმის სამი ათწლეულის განმავლობაში იცვლიდა სამართლებრივ სახესა და სახელწოდებას, მაგრამ მისი არსი უცვლელი რჩებოდა: ორი ადვოკატის უწყვეტი, პირადი პასუხისმგებლობა კლიენტის საქმეზე. სწორედ ამიტომ ითვლის ბიურო თავის ისტორიას 1996 წლიდან. ციცინო ცხვედიანი საერთო სპეციალიზაციის ადვოკატია და სისხლის სამართლის საქმეებშიც წარმატებით აქვს მონაწილეობა მიღებული, თუმცა მისი მომსახურების ძირითადი სფეროა სამოქალაქო და ადმინისტრაციული სამართალი. ამასთან, იგი არის ბავშვთა უფლებების სპეციალიზებული ადვოკატი — მიმართულება, რომელიც ადვოკატისგან არა მხოლოდ სამართლებრივ ცოდნას, არამედ ბავშვის საუკეთესო ინტერესის სტანდარტთან მუშაობის განსაკუთრებულ უნარსაც მოითხოვს.

ქართული ადვოკატურის პროფესიული ეთიკის სისტემა მისი უშუალო მონაწილეობით ჩამოყალიბდა. 2006-2009 წლებში, საქართველოს ადვოკატთა ასოციაციის პირველი მოწვევისას, ციცინო ცხვედიანი იყო ასოციაციის ეთიკის კომისიის პირველი თავმჯდომარე — ანუ სწორედ მას ერგო ის ამოცანა, რომ ქართველ ადვოკატთა ეთიკის ნორმები ცარიელ ფურცელზე პრაქტიკულ, მოქმედ სისტემად ექცია. ეს გამოცდილება პროფესიულმა საზოგადოებამ მოგვიანებით კვლავ მოითხოვა: 2013-2017 წლებში იგი მეორედ ხელმძღვანელობდა ეთიკის კომისიას.

ინსტიტუციური ნდობის ამავე ხაზზეა მისი შემდგომი მანდატებიც: 2021-2025 წლებში იყო ასოციაციის აღმასრულებელი საბჭოს წევრი — ამ თანამდებობაზე იგი 2021 წლის 11 დეკემბრის საერთო კრებამ მეორე ვადით აირჩია, ვინაიდან საბჭოს წევრი 2017-2021 წლებშიც გახლდათ. იგი ასევე არის ა(ა)იპ „საქართველოს საადვოკატო ბიუროთა გაერთიანების“ თავმჯდომარე და საქართველოს ადვოკატთა ასოციაციის მენტორი ადვოკატი, რომელიც ახალგაზრდა კოლეგების პროფესიულ მომზადებაში მონაწილეობს.

ბიუროს ისტორიაში მისი წვლილი დამფუძნებლის რანგისაა. 2010 წელს ამხანაგობამ სახელწოდება შეიცვალა და „ციცინო ცხვედიანის საადვოკატო ბიურო“ გახდა, რომლის თავმჯდომარეც იგი იყო. 2006 წელს „ადვოკატთა და დამცველთა ასოციაციის“ რეორგანიზაციით ჩამოყალიბებულ ამხანაგობა „ზურაბ როსტიაშვილის საადვოკატო ბიუროში“ კი თავმჯდომარის მოადგილის პოზიციას იკავებდა.

1996 წელს, ზურაბ როსტიაშვილთან და სხვა კოლეგებთან ერთად, მან დააფუძნა „ადვოკატთა და დამცველთა ასოციაცია“ და გახლდათ მისი ვიცე-პრეზიდენტი. 1995 წელს კი, ქართლოს ღარიბაშვილთან და სხვებთან ერთად, დააფუძნა „საქართველოს ადვოკატთა დამოუკიდებელი კორპორაცია“, რომლის წევრიც იყო 1996 წლამდე.

პროფესიული გზა მან კერძო ადვოკატურაში დაიწყო: 1991-1996 წლებში მუშაობდა სამართლებრივი მომსახურების კოოპერატივ „იურისტში“ და გახლდათ მისი თავმჯდომარე.ციცინო ფლობს ქართულ და რუსულ ენებს.

ლევან დვალიშვილი ბიუროს გუნდის ერთ-ერთი ყველაზე დიდი სტაჟის მქონე ადვოკატია, რომლის საქმიანობა ბიუროსთან 2006 წლიდან არის დაკავშირებული. ძირითადად სისხლის სამართლის სპეციალიზაციის მიმართულებით მუშაობს; ამასთან, იგი არასრულწლოვანთა მართლმსაჯულებაში სპეციალიზებული ადვოკატია.

ადვოკატ ლევან დვალიშვილის პრაქტიკის მთავარი მაჩვენებელი შედეგებია: მას მოგებული აქვს სისხლის სამართლის არაერთი რთული საქმე. ასეთი კატეგორია — მრავალეპიზოდიანი და მტკიცებულებით დატვირთული საქმეები — ადვოკატისგან არა მხოლოდ სამართლებრივ ცოდნას, არამედ - პროცესის ხანგრძლივად, ეტაპობრივად წარმართვის უნარსაც მოითხოვს, სადაც შედეგი თვეებისა და წლების თანმიმდევრული მუშაობით მზადდება. ეროვნულ ინსტანციებთან ერთად, იგი მუშაობს ადამიანის უფლებათა ევროპული სასამართლოს მიმართულებითაც.ლევან დვალიშვილმა საადვოკატო კვალიფიკაცია ორ ეტაპად ჩამოაყალიბა: 2006 წელს ჩააბარა ადვოკატთა საკვალიფიკაციო გამოცდა სისხლის სამართლის სპეციალიზაციით, ხოლო 2012 წელს — სამოქალაქო სამართლის სპეციალიზაციითაც. 2011-2012 წლებში იგი მუშაობდა ამხანაგობა „ციცინო ცხვედიანის საადვოკატო ბიუროში“, 2009-2011 წლებში კი — ამხანაგობა „ზურაბ როსტიაშვილის საადვოკატო ბიუროში“. ამრიგად,მას დღევანდელი გაერთიანებული ბიუროს ორივე შემადგენელ ნაწილში მუშაობის გამოცდილება აქვს.

კვალიფიკაციის ამაღლების მიზნით მან არაერთი ტრენინგ-კურსიც გაიარა და მონაწილეობა მიიღო სხვადასხვა პროფესიულ პროექტში.

ლევან დვალიშვილმა უმაღლესი იურიდიული განათლება ივანე ჯავახიშვილის სახელობის თბილისის სახელმწიფო უნივერსიტეტის იურიდიულ ფაკულტეტზე მიიღო, რომელიც 2006 წელს დაასრულა და მას შემდეგ ადვოკატურაშია.

ლევანი ფლობს ქართულ, რუსულ და ინგლისურ ენებს.

თავისი პროფესიული საქმიანობის პარალელურად, იგი აქტიურად შეისწავლის ქართულ ისტორიულ მეიარაღეობას, სამეცნიერო ჟურნალებსა და ინტერნეტგამოცემებში გამოქვეყნებული აქვს არაერთი ნაშრომი და სტატია, 2023 წელს გამოსცა წიგნი - მონოგრაფია „თბილისური ფოლადი და ელიარაშვილები“.

იზა წულაია ბიუროს ერთ-ერთი ყველაზე დიდი სტაჟის და გამოცდილების მქონე ადვოკატია — 2007 წლიდან, ჯერ კიდევ ამხანაგობა „ზ. როსტიაშვილის საადვოკატო ბიუროს“ პერიოდიდან, იგი უწყვეტად მუშაობს ამ გუნდში. თითქმის ორი ათწლეულის განმავლობაში ერთსა და იმავე ბიუროსთან თანამშრომლობა თავად არის იმის მაჩვენებელი, რასაც კლიენტი ადვოკატში ეძებს: სტაბილურობა, პასუხისმგებლობა და გუნდის ნდობა.

მისი პრაქტიკის ძირითადი მიმართულებაა სამოქალაქო სამართალი, რომელშიც სპეციალიზაცია 2006 წელს, საქართველოს ადვოკატთა ასოციაციის ტესტირების გავლით მოიპოვა. 2020 წელს მან ბავშვთა უფლებების სპეციალიზაციაც მიიღო — მიმართულება, რომელიც ბიუროს ერთ-ერთი პროფილური სფეროა და სადაც მისი გამოცდილება კოლეგების პრაქტიკას ავსებს.

პროფესიულ განვითარებაზე იგი თანმიმდევრულად მუშაობს საერთაშორისო პროგრამების ფარგლებში. მან გაიარა ამერიკის ადვოკატთა ასოციაციის Rule of Law Initiative-ისა და საქართველოს ადვოკატთა ასოციაციის ერთობლივი ტრენინგები; USAID-ის პროგრამით განხორციელებული კურსები სამოქალაქო სამართალსა და სამოქალაქო პროცესში; ევროკავშირის მიერ დაფინანსებული პროექტის „კანონის უზენაესობის მხარდაჭერა საქართველოში“ ფარგლებში - ტრენინგი ადამიანის უფლებათა ევროპული სტანდარტების შესახებ, ასევე ამერიკის იურისტთა ასოციაციის საბაზისო კურსი სასამართლო ექსპერტიზისა და ექსპერტ-მოწმის მიმართულებით. მისი კვალიფიკაცია მოიცავს ადმინისტრაციულ სამართალსა და საგადასახადო დავებსაც.

საადვოკატო საქმიანობის დაწყებამდე იზა წულაიამ იურიდიული გამოცდილება სამოქალაქო სექტორსა და სასამართლო სისტემაში დააგროვა: 2002-2007 წლებში იგი მუშაობდა თბილისის საერთაშორისო საქველმოქმედო ფონდ „იუნონაში“ — ჯერ იურისტ-კონსულტანტად, შემდეგ იურისტად, ხოლო 1999-2001 წლებში საქართველოს უზენაეს სასამართლოში, სასამართლო გადაწყვეტილებების კორექტირების, იურიდიული ლექსიკონისა და იურიდიული ენციკლოპედიის გამოცემის განყოფილებაში.

სწორედ ეს უკანასკნელი გამოცდილება ხსნის მისი პროფესიული ხელწერის ერთ-ერთ თავისებურებას. სამართლის დარგის შესწავლამდე — 1985-1990 წლებში — მან თბილისის სახელმწიფო უნივერსიტეტის ფილოლოგიის ფაკულტეტი დაამთავრა რუსული ენისა და ლიტერატურის სპეციალობით. უზენაეს სასამართლოში სწორედ ენისა და სამართლის გადაკვეთაზე მუშაობდა, სამართლებრივი დოკუმენტის სიზუსტე, ფორმულირების სიცხადე და ტერმინოლოგიური კულტურა მისთვის არა მეორეხარისხოვანი დეტალი, არამედ პროფესიის ნაწილია — თვისება, რომელიც სამოქალაქო დავებში (სადაც საქმის ბედს ხშირად ხელშეკრულების ერთი ფრაზა წყვეტს) პირდაპირ შედეგზე აისახება.

იურისტის დიპლომი მან 2002 წელს მიიღო ივანე ჯავახიშვილის სახელობის თბილისის სახელმწიფო უნივერსიტეტის იურიდიულ ფაკულტეტზე.

იზა ფლობს ქართულ, ინგლისურ და რუსულ ენებს.

გიორგი ქათამაძე ადვოკატის სტატუსით 2016 წლიდან საქმიანობს, 2022 წლიდან მთლიანად კერძო საადვოკატო პრაქტიკაზეა კონცენტრირებული. მისი საქმიანობის ბირთვია კლიენტის წარმომადგენლობა სასამართლოსა და არბიტრაჟში — სამოქალაქო, საბანკო, სახელშეკრულებო და აღსრულების დავებში, ასევე ადმინისტრაციულ და სისხლის სამართლის საქმეებში. იგი უზრუნველყოფს დავის სრულ ციკლს: სამართლებრივი პოზიციის შემუშავებას, სარჩელებისა და შესაგებლების მომზადებას, სარჩელის უზრუნველყოფის ღონისძიებებზე შუამდგომლობებს, მორიგების შეთანხმებებზე მოლაპარაკებას და პროცესზე წარმომადგენლობას ყველა ინსტანციაში. მისი საქმიანობა ეროვნული ინსტანციებით არ შემოიფარგლება და ადამიანის უფლებათა ევროპული სასამართლოს მიმართულებასაც მოიცავს. 2018-2022 წლებში მუშაობდა იურისკონსულტად სს „ვითიბი ბანკ ჯორჯიასა“ და სს „ბაზისბანკში“.

პროფესიის ინსტიტუციურ განვითარებაში იგი 2017 წლიდან მონაწილეობს: 2022 წლიდან არის საქართველოს ადვოკატთა ასოციაციის ახალგაზრდა ადვოკატთა კომიტეტის წევრი, 2018-2021 წლებში იყო სამოქალაქო კომიტეტის წევრი, სადაც სამოქალაქო სამართლის სფეროში საკანონმდებლო ინიციატივების განხილვასა და დამუშავებაზე მუშაობდა, ხოლო 2017-2018 წლებში — რეგიონებთან ურთიერთობის კომიტეტის წევრი.

პრაქტიკულ საქმიანობას იგი აკადემიურ კვლევასთან აერთიანებს. 2021 წლიდან არის სამართლის დოქტორანტი სულხან-საბა ორბელიანის უნივერსიტეტში. მისი პუბლიკაციები ეხება შრომითი ურთიერთობების საერთაშორისო სტანდარტებთან შესაბამისობას (საქართველოს უზენაესი სასამართლოს 2021 წლის 25 ნოემბრის გადაწყვეტილების ანალიზი საქმეზე №ას-855-2021, თანაავტორობით), რეგულირებული შეთანხმების ინსტიტუტს საქართველოსა და გაერთიანებულ სამეფოში, ასევე სარჩელის უზრუნველყოფის ღონისძიების გამოყენებას პირადი არაქონებრივი უფლებების დაცვისას.

მისი საადვოკატო კვალიფიკაცია ეტაპობრივად, საკვალიფიკაციო გამოცდების გზით ჩამოყალიბდა: 2014 წელს ჩააბარა ადვოკატთა საკვალიფიკაციო გამოცდა სამოქალაქო სამართლის სპეციალიზაციით და 2016 წლიდან არის ადვოკატი; 2019 წელს ჩააბარა გამოცდა სისხლის სამართლის სპეციალიზაციითაც და ამავე წლიდან საერთო სპეციალიზაციის ადვოკატია; 2020 წელს კი მოიპოვა ბავშვთა უფლებებისა და არასრულწლოვანთა მართლმსაჯულების სპეციალიზაციები. 2021 წელს გაიარა საქართველოს მედიატორთა ასოციაციის სავალდებულო ტრენინგები.

პროფესიული გზა მან სტაჟიორობით დაიწყო: 2012-2013 წლებში სს „ვითიბი ბანკ ჯორჯიას“ იურიდიული სამმართველოს სასარჩელო-საპრეტენზიო განყოფილებაში, 2015 წელს — ადვოკატ მაია პაპელაშვილთან, ხოლო 2015-2017 წლებში უკვე ადვოკატად მუშაობდა იურიდიული დახმარების კომპანიაში შპს „სამართლის სახლი“, სადაც კლიენტთა კონსულტირებასა და სამოქალაქო და ადმინისტრაციულ დავებში წარმომადგენლობას უზრუნველყოფდა.

სამართლის მაგისტრის აკადემიური ხარისხი გიორგიმ 2019 წელს მიიღო სულხან-საბა ორბელიანის უნივერსიტეტში, ხოლო იურიდიული ბაკალავრის ხარისხი 2013 წელს — სომხურ-რუსული საერთაშორისო უნივერსიტეტის „მხითარ გოში“ (სომხეთი) იურიდიულ ფაკულტეტზე.

გიორგი ფლობს ქართულ და რუსულ ენებს.

ნუგბარა როსტიაშვილი 2025 წლიდან არის საქართველოს ადვოკატთა ასოციაციის აღმასრულებელი საბჭოს წევრი. 2022-2025 წლებში იგი ასოციაციის ახალგაზრდა ადვოკატთა კომიტეტის წევრი გახლდათ — ანუ პროფესიის ინსტიტუციურ მართვაში მისი ჩართულობა თანმიმდევრულად, კომიტეტის დონიდან ასოციაციის უმაღლეს აღმასრულებელ ორგანომდე გაიზარდა.

2018 წლიდან დღემდე იგი ახორციელებს საადვოკატო საქმიანობას სამოქალაქო, ადმინისტრაციული სამართლისა და ბავშვთა უფლებების მიმართულებით. ასევე ადამიანის უფლებათა ევროპული სასამართლოს მიმართულებით.

მისი პრაქტიკის განსაკუთრებული სფეროა არასრულწლოვანთა უფლებების დაცვა — როგორც საქართველოში, ისე საზღვარგარეთ, მათ შორის არამართლზომიერად გადაადგილებულ ბავშვებთან დაკავშირებულ დავებში. ეს კატეგორია სამოქალაქო სამართლის ერთ-ერთი ყველაზე რთული სეგმენტია: ადვოკატს უწევს ერთდროულად იმუშაოს ორი ქვეყნის სამართლებრივ სისტემასთან, საერთაშორისო ხელშეკრულებებთან და უცხოური იურისდიქციის სასამართლოებთან, ისე, რომ პროცესის ცენტრში ბავშვის საუკეთესო ინტერესი დარჩეს — და ყოველივე ეს დროის იმ სიმცირეში, რომელიც ასეთ საქმეებში კრიტიკულ ფაქტორად რჩება. ბიუროსთვის ეს მიმართულება მისი პროფესიული ხელწერით არის განვითარებული.

საერთაშორისო საქმეებთან ერთად, მისი პრაქტიკა ადამიანის უფლებათა ევროპული სასამართლოს მიმართულებასაც მოიცავს — ინსტანციისა, რომლის პრაქტიკამაც ბავშვის უფლებებისა და საოჯახო ცხოვრების პატივისცემის სტანდარტები მნიშვნელოვნად ჩამოაყალიბა.

2015-2016 წლებში იგი გადიოდა სტაჟირებას ციცინო ცხვედიანის საადვოკატო ბიუროში სამოქალაქო და ადმინისტრაციული სპეციალიზაციით, 2013-2014 წლებში - ზურაბ როსტიაშვილის საადვოკატო ბიუროში, სისხლის სამართლის მიმართულებით , 2015-2017 წელს ციცინო ცხვედიანის საადვოკატო ბიუროში ადვოკატის თანაშემწე მუშაობდა. ამრიგად, პროფესიაში იგი ბიუროს ორივე ძირითადი სკოლის გავლით შევიდა. 2016-2017 წლებში იყო ლექტორის თანაშემწე ევროკავშირის სამართალში — ეს იყო გამოცდილება, რომელმაც მისი დღევანდელი საერთაშორისო პრაქტიკის თეორიული საფუძველი შექმნა.

2016 წლეს დაასრულა საბაკალავრო საფეხურ სულხან-საბა ორბელიანის სასწავლო უნივერსიტეტის სამართალმცოდნეობის ფაკულტეტზე.

ნუგბარა ფლობს ინგლისურ, რუსულ და იტალიურ ენებს, რაც მას საშუალებას აძლევს, საერთაშორისო საქმეებში უცხოელ კოლეგებთან და უცხოური იურისდიქციის ინსტანციებთან უშუალოდ, თარჯიმნის გარეშე იმუშაოს.

ნანუკა ქიმაძე 2021 წლიდან არის ბიუროს ადვოკატი. იგი საერთო სპეციალიზაციის ადვოკატია — სისხლის, სამოქალაქო და ადმინისტრაციული სამართლის მიმართულებით — და, ამასთან, ფლობს სპეციალიზებული ადვოკატის ხარისხს არასრულწლოვანთა მართლმსაჯულებასა და ბავშვთა უფლებებში, რომელიც 2021 წელს მიენიჭა.

მისი პროფესიული პროფილი თანმიმდევრულად, სისხლის სამართლის მიმართულებით ჩამოყალიბდა. სამართლის მაგისტრის ხარისხი მან სწორედ სისხლის სამართლის მიმართულებით მიიღო გურამ თავართქილაძის სასწავლო უნივერსიტეტის სამართალმცოდნეობის ფაკულტეტზე, ხოლო ადვოკატის კვალიფიკაცია საერთო სპეციალიზაციაში 2019 წლის დეკემბერში მოიპოვა.

ბიუროში იგი 2020 წელს, ადვოკატის თანაშემწის პოზიციაზე მოვიდა და პრაქტიკული მომზადება უშუალოდ გუნდის შიგნით გაიარა. მანამდე მისი გამოცდილება რამდენიმე განსხვავებულ სამართლებრივ გარემოს მოიცავდა: 2019-2020 წლებში სტაჟირებას გადიოდა ახალგაზრდა კრიმინოლოგთა ჯგუფში, 2019 წელს — ადვოკატ დავით ჯინჯელავას იურიდიულ ბიუროში, ხოლო 2017 წელს, საუნივერსიტეტო კლინიკის ფარგლებში, საქართველოს ადვოკატთა ასოციაციის ეთიკის კომისიის აპარატში, სადაც საქმეთა გაცნობასა და კლასიფიცირებაზე მუშაობდა.

ნანუკა ფლობს ქართულ და ინგლისურ ენებს.

ქეთი წიწუაშვილი 2026 წლის ივნისიდან კვლავ ბიუროს გუნდის წევრია. იგი საერთო სპეციალიზაციის ადვოკატია და, ამასთან, დამატებით სპეციალიზებულია არასრულწლოვანთა მართლმსაჯულებასა და ბავშვთა უფლებებში — ანუ იმ ორ მიმართულებაში, რომლებიც ბიუროს პროფესიულ სახეს განსაზღვრავს.

ბიუროში დაბრუნებამდე, 2024 წლის აგვისტოდან 2026 წლის აპრილამდე, იგი მუშაობდა საქართველოს ახალგაზრდა იურისტთა ასოციაციის იურიდიული დახმარების ცენტრში, სისხლის სამართლის ადვოკატის პოზიციაზე. ეს არის პრაქტიკის ის სეგმენტი, სადაც ადვოკატი ყველაზე ინტენსიურ საქმეთა ნაკადს ხვდება და დაცვის უნარები ყველაზე სწრაფად ყალიბდება — გამოცდილება, რომელიც მან ბიუროში დაბრუნებისას თან წამოიღო.

მისი პრაქტიკის გამორჩეული მიმართულებაა ნაფიც მსაჯულთა სასამართლო. ქართულ სისხლის სამართლის პროცესში ეს ყველაზე მომთხოვნი ფორმატია: ვერდიქტი დასაბუთებას არ საჭიროებს და ფაქტობრივ ნაწილში გასაჩივრებას არ ექვემდებარება, ანუ ადვოკატს მეორე მცდელობა არ ეძლევა. აქ საქმეს წყვეტს არა წერილობითი პოზიციის სიმტკიცე, არამედ- ის, თუ როგორ აღიქვამს მტკიცებულებას თორმეტი თანამოქალაქე. ქეთი წიწუაშვილს ამ ფორმატში მუშაობის მნიშვნელოვანი გამოცდილება აქვს — და სწორედ ეს გამოცდილება აერთიანებს მას ბიუროს იმ ტრადიციასთან, რომელიც ზურაბ როსტიაშვილის ნაფიც მსაჯულთა პროცესებიდან იღებს სათავეს.

ეროვნული ინსტანციების პარალელურად, მისი საქმიანობა ადამიანის უფლებათა ევროპული სასამართლოს მიმართულებასაც მოიცავს.

საადვოკატო საქმიანობას ქეთი წიწუაშვილი 2021 წლის აპრილიდან ეწევა, როდესაც საქართველოს ადვოკატთა ასოციაციის წევრი გახდა. მისი პროფესიული გზა ამავე ბიუროში დაიწყო: 2021 წლის აპრილიდან 2024 წლის აგვისტომდე იგი აქ ადვოკატად მუშაობდა, ხოლო მანამდე — 2020 წლის ივლისიდან 2021 წლის აპრილამდე — სწორედ აქ გაიარა სტაჟირება. ამრიგად, ბიუროსთან მისი კავშირი პროფესიაში შესვლის პირველივე დღიდან იღებს სათავეს.

მისი მომზადება საერთაშორისო კომპონენტსაც მოიცავს. 2018-2019 წლებში მან გაიარა სასერტიფიკატო პროგრამა ჩიკაგო-კენტის ამერიკული სამართლის სკოლაში, 2017-2018 წლებში კი მონაწილეობდა გაერთიანებული ერების ორგანიზაციის მოდელირების საერთაშორისო კონფერენციებში გერმანიასა და ჩეხეთში. 2013-2017 წლებში მუშაობდა საქართველოს ეროვნული არქივის საორგანიზაციო განყოფილებაში.

სამართლის ბაკალავრის აკადემიური ხარისხი მან 2013 წელს მიიღო ივანე ჯავახიშვილის სახელობის თბილისის სახელმწიფო უნივერსიტეტში.

ქეთი ფლობს ქართულ და ინგლისურ ენებს.

ვლადიმერ ბუხრიკიძე 2021 წლის ნოემბრიდან არის ბიუროს ადვოკატი. იგი სისხლის სამართლის მიმართულებით მოქმედი სერტიფიცირებული ადვოკატია, არასრულწლოვანთა მართლმსაჯულების სპეციალიზაციით — ანუ ბიუროს ერთ-ერთ პროფილურ სფეროში მუშაობს.

მისი საქმიანობის პრიორიტეტია კლიენტის ინტერესების დაცვა სისხლის სამართლის პროცესში: საქმისწარმოება, სამართლებრივი პოზიციის შემუშავება, სარჩელების, შუამდგომლობებისა და საჩივრების მომზადება და წარმომადგენლობა სასამართლოში. არასრულწლოვანთა საქმეებში იგი მუშაობს იმ სპეციალიზებული სტანდარტების დაცვით, რომლებიც ბავშვის საუკეთესო ინტერესს პროცესის ცენტრში აყენებს.

საადვოკატო კვალიფიკაცია მან 2021 წელს მოიპოვა — ჩააბარა ადვოკატთა საკვალიფიკაციო გამოცდა სისხლის სამართლის სპეციალიზაციით და ამავე წელს მიიღო არასრულწლოვანთა მართლმსაჯულების სპეციალიზაცია.

სამართლის მაგისტრის ხარისხი მან სისხლის სამართლის მიმართულებით 2012 წელს მიიღო საქართველოს ტექნიკურ უნივერსიტეტში, სადაც 2010 წელს სამართალმცოდნეობის საბაკალავრო საფეხურიც დაასრულა.

ვლადიმერი ფლობს ქართულ და ინგლისურ ენებს.

თეა პატაშური საერთო სპეციალიზაციის ადვოკატია და საქართველოს ადვოკატთა ასოციაციის წევრი 2013 წლიდან. საადვოკატო კვალიფიკაცია მან 2010 წელს, საერთო სპეციალიზაციის ტესტირების გავლით მოიპოვა, ხოლო 2020 წელს შეიძინა დამატებითი სპეციალიზაცია არასრულწლოვანთა მართლმსაჯულებასა და არასრულწლოვანთა სამოქალაქო საქმეებში — მიმართულება, რომელიც ბიუროს ერთ-ერთი პროფილური სფეროა.

მისი პრაქტიკის მნიშვნელოვანი კომპონენტია მედიაცია და დავის მოგვარების ალტერნატიული გზები. მან გაიარა 40-საათიანი სამედიაციო ტრენინგი და არაერთი კურსი ადვოკატის როლზე მედიაციის პროცესში — ცოდნა, რომელიც კლიენტს საშუალებას აძლევს, საქმე ხშირად სასამართლომდე მოაგვაროს, დროისა და რესურსის დაზოგვით. 2024 წელს მან გაიარა სპეციალიზებული მომზადება ნაფიც მსაჯულთა სასამართლოს მიმართულებით — მსაჯულთა შერჩევის, პირდაპირი და ჯვარედინი დაკითხვისა და დასკვნითი სიტყვის ტექნიკაში.

პროფესიულ განვითარებას იგი თანმიმდევრულად განაგრძობს. მისი კვალიფიკაცია მოიცავს ადამიანის უფლებათა დაცვის საერთაშორისო და რეგიონული სტანდარტების კურსებს, ადვოკატთა პროფესიული ეთიკის ტრენინგებს, ხოლო 2024 წელს გაიარა მოსამართლეთა საკვალიფიკაციო გამოცდისთვის მოსამზადებელი კურსი სამოქალაქო და ადმინისტრაციული სამართლის სპეციალიზაციით.

საადვოკატო საქმიანობის პარალელურად, თეა პატაშური 2008 წლიდან ხელმძღვანელობს დუშეთის მხარეთმცოდნეობის მუზეუმს დირექტორის რანგში — ესაა გამოცდილება, რომელიც მან ინსტიტუციური მართვისა და საჯარო პასუხისმგებლობის სფეროშიც შეიძინა.

უმაღლესი იურიდიული განათლება მან ჰუმანიტარულ-ტექნიკური ინსტიტუტის იურიდიულ ფაკულტეტზე მიიღო. ასევე აქვს საქართველოს ფრანგული ინსტიტუტის დიპლომები ფრანგულ ენაში.

თეა ფლობს ქართულ და ფრანგულ ენებს.

ქრისტინე ხვიჩია 2025 წლიდან არის ბიუროს ადვოკატი. სისხლის სამართლის პრაქტიკის პარალელურად, 2024 წლიდან საქმიანობს სამოქალაქო და ადმინისტრაციული სამართლის მიმართულებითაც: უზრუნველყოფს სასამართლო წარმომადგენლობას, აწარმოებს მოლაპარაკებებსა და დავებს როგორც ფიზიკურ და იურიდიულ პირებთან, ისე - ადმინისტრაციულ ორგანოებთან.

ბიუროში იგი 2024 წელს, სტაჟიორ-ადვოკატის პოზიციაზე მოვიდა და პრაქტიკული მომზადება უშუალოდ გუნდის შიგნით გაიარა. მისი პროფესიული საფუძველი კი ჯერ კიდევ ადრე, სასამართლო სისტემაში ჩამოყალიბდა: 2019-2020 წლებში პრაქტიკას გადიოდა თბილისის საქალაქო სასამართლოს სისხლის სამართლის საქმეთა საგამოძიებო, წინასასამართლო სხდომისა და არსებითი განხილვის კოლეგიაში — ანუ სისხლის სამართლის პროცესის სამივე კრიტიკულ ეტაპს შიგნიდან დააკვირდა. 2021-2024 წლებში სტაჟირებას გადიოდა საადვოკატო კომპანიაში „ამაღლობელი ჰოლდინგი“.

აკადემიური მიმართულებით იგი სისხლის სამართლის მაგისტრატურას გადის ილიას სახელმწიფო უნივერსიტეტში, სადაც 2020 წელს სამართალმცოდნეობის საბაკალავრო საფეხურიც დაასრულა. სწავლის პერიოდში იყო სახელმწიფო გრანტის მფლობელი და საქართველოს პრეზიდენტის სტიპენდიანტი. მისი მომზადება რამდენიმე დამატებით პროგრამასაც მოიცავს: „ღია საზოგადოება — საქართველოსა“ და ილიას სახელმწიფო უნივერსიტეტის სამართლის სკოლის საზაფხულო სკოლას, ევროპულ-ქართული ინსტიტუტის „სამოქალაქო ქმედების სკოლას“ და თავისუფალი უნივერსიტეტის ბაზალეთის სასწავლო ცენტრის პროგრამას საქართველოს პრეზიდენტის სარეზერვო ფონდის მხარდაჭერით.

პროფესიულ საქმიანობასთან ერთად, მას სასწავლო - საგანმანათლებლო გამოცდილებაც აქვს: იყო ტუტორი და სწავლების ასისტენტი ილიას სახელმწიფო უნივერსიტეტში, ტრენერი USAID-ის მიერ დაფინანსებულ პროგრამაში „ტოლერანტობის, სამოქალაქო ცნობიერებისა და ინტეგრაციის მხარდაჭერა“ (PITA), ხოლო 2017 წელს — პროექტების კოორდინატორი კონსტიტუციური კვლევების ცენტრში. 2019 წელს იყო სემინარისტი ილიას სახელმწიფო უნივერსიტეტში სამოქალაქო განათლების მოსამზადებელ პროგრამაზე. იგი ასევე სერტიფიცირებულია მასწავლებელთა საკვალიფიკაციო გამოცდაზე სამოქალაქო განათლების მიმართულებით.

ქრისტინე ფლობს ინგლისურ და რუსულ ენებს, ასევე - გერმანულის საწყის დონეს.

ანა ბერია ბიუროს ადვოკატია 2024 წლის მაისიდან. მანამდე, 2023 წლიდან, იმავე ბიუროში ადვოკატის თანაშემწედ მუშაობდა.

სამართლის ბაკალავრის (2017–2021) და სისხლის სამართლის მაგისტრის (2021–2023) ხარისხები მიიღო ილიას სახელმწიფო უნივერსიტეტში, ორივე მაღალი აკადემიური მოსწრებით. მისი სამაგისტრო ნაშრომი ეხებოდა ნულიფიკაციის პრობლემას ნაფიც მსაჯულთა სასამართლო პროცესში.

პროფესიულ საქმიანობამდე ჩართული იყო კვლევით და მონიტორინგულ საქმიანობაში — მუშაობდა ტოლერანტობისა და მრავალფეროვნების ინსტიტუტში (TDI) და აწარმოებდა სასამართლო მონიტორინგს საქართველოს დემოკრატიული ინიციატივის ცენტრის (GDI) პროექტის ფარგლებში.

გავლილი აქვს არაერთი პროფესიული ტრენინგი, მათ შორის - ევროპის საბჭოს HELP პროგრამის კურსი ადამიანის უფლებათა ევროპულ კონვენციასა და ევროსასამართლოზე (ECHR/ECtHR).